शिरोळ / शिवार न्यूज नेटवर्क :
राज्यात वाढत्या तापमानामुळे नागरिकांसह विद्यार्थ्यांच्या आरोग्याची चिंता वाढू लागली आहे. विशेषतः कोल्हापूर जिल्ह्यात उन्हाचा पारा लक्षणीयरीत्या वाढल्याने प्रशासनाने महत्त्वाचा निर्णय घेतला आहे. जिल्हा परिषदेच्या (ZP) प्राथमिक शाळा आता सकाळच्या सत्रात घेण्याचे आदेश देण्यात आले आहेत.प्राथमिक शिक्षणाधिकारी मीना शेंडकर यांनी याबाबत माहिती देताना सांगितले की, ८ सप्टेंबर २०१५ च्या शासन निर्णयानुसार शाळांच्या वेळा व सुट्ट्यांबाबत निर्णय घेण्याचे अधिकार संबंधित शिक्षणाधिकाऱ्यांना आहेत. सध्याच्या तीव्र उष्णतेच्या पार्श्वभूमीवर विद्यार्थ्यांच्या आरोग्याची काळजी घेणे अत्यावश्यक असल्याने हा निर्णय घेण्यात आला आहे.नवीन वेळापत्रकानुसार शाळा सकाळी ७.२० ते ११.३० या वेळेत भरवण्यात येणार आहेत. शिक्षकांनी पूर्वतयारीसाठी सकाळी ७ वाजेपर्यंत शाळेत उपस्थित राहण्याचे निर्देश देण्यात आले आहेत. यामुळे विद्यार्थ्यांना दुपारच्या कडक उन्हाचा त्रास सहन करावा लागणार नाही.गेल्या काही दिवसांपासून सकाळी दहाच्या सुमारासच उन्हाची तीव्रता वाढताना दिसत आहे. अशा परिस्थितीत विद्यार्थ्यांना डिहायड्रेशन, चक्कर येणे, भोवळ येणे तसेच त्वचेविषयक समस्या उद्भवण्याची शक्यता असते. या सर्व धोके टाळण्यासाठी सकाळच्या सत्रात शाळा घेणे हा एक प्रभावी उपाय असल्याचे शिक्षण विभागाचे मत आहे.
दरम्यान, राज्यातील काही भागांत हवामानात बदल दिसत असून मुंबई आणि ठाणे येथे तापमानात किंचित घट झाली आहे. तरीही पुढील काही दिवसांत पुन्हा उष्णतेची लाट येण्याची शक्यता हवामान खात्याने वर्तवली आहे.विद्यार्थ्यांच्या सुरक्षिततेला प्राधान्य देत घेतलेला हा निर्णय शैक्षणिकदृष्ट्या देखील उपयुक्त ठरणार असून पालकांकडून त्याचे स्वागत केले जात आहे.