अब्दुललाट । शिवार न्यूज नेटवर्क :
गाईला जुळे वासरे होण्याच्या घटना अधूनमधून घडत असल्या तरी एकाच वेळी तीन वासरांचा जन्म होणे ही अत्यंत दुर्मिळ बाब मानली जाते. मात्र अब्दुल लाट येथील शेतकरी व पशुपालक महावीर पारिसा बरगाले यांच्या गोठ्यातील जर्शी गाईने चक्क तीन सुदृढ वासरांना जन्म देत सर्वांनाच आश्चर्याचा सुखद धक्का दिला आहे. विशेष म्हणजे प्रसूतीनंतर गाय आणि तिन्ही वासरे पूर्णपणे निरोगी असून त्यांच्या प्रकृतीत कोणतीही अडचण नसल्याने बरगाले कुटुंबासह परिसरातील नागरिकांमध्ये आनंदाचे वातावरण आहे.
महावीर बरगाले हे शेतीसोबत दुग्ध व्यवसायही करतात. त्यांच्या गोठ्यातील जर्शी गाईची प्रसूती सुरू झाल्यानंतर सुरुवातीला दोन वासरे जन्माला आली.त्यानंतर आणखी एका वासराचा जन्म झाल्याने उपस्थितांची उत्सुकता आणि आनंद द्विगुणित झाला.तिन्ही वासरे चांगल्या प्रकृतीची असून आईचे दूध व्यवस्थित पित आहेत.गायदेखील पूर्णपणे सुदृढ असल्याची माहिती कुटुंबीयांनी दिली.
पशुसंवर्धन क्षेत्रातील जाणकारांच्या मते, गाईमध्ये तिहेरी गर्भधारणा होणे आणि तिन्ही वासरांचा सुरक्षित जन्म होणे ही अत्यंत दुर्मिळ घटना आहे. अशा प्रसंगी प्रसूतीदरम्यान गुंतागुंत होण्याची शक्यता अधिक असते. मात्र योग्य काळजी, वेळेवर केलेले व्यवस्थापन आणि निसर्गाची साथ यामुळे गाय व तिन्ही वासरे सुरक्षित राहिली आहेत.
या अनोख्या घटनेची माहिती परिसरात पसरताच अनेक शेतकरी, पशुपालक आणि नागरिकांनी बरगाले यांच्या गोठ्याला भेट देत तिन्ही वासरे पाहण्यासाठी गर्दी करत आहेत. अनेकांनी ही घटना शुभ मानत बरगाले कुटुंबाचे अभिनंदन केले. सध्या अब्दुल लाट परिसरात या दुर्मिळ घटनेची जोरदार चर्चा सुरू असून पशुपालन क्षेत्रातही हा एक कौतुकाचा विषय ठरला आहे.