६ कोटींच्या निधीतून कुरुंदवाड–नांदणी रस्त्याच्या कामाचा शुभारंभ
कुरुंदवाड । शिवार न्यूज नेटवर्क :
दरवर्षी पुराच्या पाण्याचा तडाखा सहन करणाऱ्या आणि नांदणीच्या भाजीपाला उत्पादक शेतकऱ्यांसाठी जीवनवाहिनी ठरलेल्या कुरुंदवाड–नांदणी रस्त्याला आता ६ कोटींच्या निधीतून मजबुती मिळणार आहे. काँक्रीटीकरण व डांबरीकरणाच्या माध्यमातून हा मार्ग अधिक टिकाऊ आणि सुरक्षित करण्यास प्राधान्य दिले असून, शेतकऱ्यांचा शेतमाल बाजारपेठेत वेळेत पोहोचला पाहिजे; त्यासाठी रस्ते विकासाला प्राधान्य देण्यात आले आहे असे प्रतिपादन आमदार राजेंद्र पाटील-यड्रावकर यांनी केले.
केंद्रीय रस्ते व पायाभूत सुविधा योजनेअंतर्गत कुरुंदवाड–नांदणी प्रमुख जिल्हा मार्ग ७३ च्या काँक्रीटीकरण व डांबरीकरणासाठी मंजूर झालेल्या ६ कोटी रुपयांच्या विकासकामाचा शुभारंभ आमदार राजेंद्र पाटील यड्रावकर यांच्या हस्ते करण्यात आला, या प्रसंगी ते बोलत होते.
आमदार यड्रावकर पुढे म्हणाले, ग्रामीण भागातील रस्ते हे केवळ वाहतुकीचे साधन नसून शेतकरी, विद्यार्थी, व्यापारी आणि सर्वसामान्य नागरिकांच्या विकासाचा महत्त्वाचा दुवा आहेत. त्यामुळे तालुक्यातील प्रमुख रस्त्यांच्या विकासासाठी शासनाकडून निधी मिळवून देण्यास आपले प्राधान्य राहणार असल्याचे आमदार यड्रावकर यांनी सांगून कुरुंदवाड–नांदणी हा शिरोळ तालुक्यातील अत्यंत महत्त्वाचा मार्ग आहे. नांदणीसह परिसरातील शेतकरी मोठ्या प्रमाणात भाजीपाला व अन्य शेतमाल कुरुंदवाडच्या बाजारपेठेत आणतात. मात्र, दरवर्षी पुरामुळे या रस्त्याची दुरवस्था होत असल्याने नागरिक आणि शेतकऱ्यांना त्रास सहन करावा लागत होता. ही समस्या कायमस्वरूपी दूर करण्यासाठी ६ कोटी रुपयांचा निधी उपलब्ध करून देण्यात आला आहे. काँक्रीटीकरण व डांबरीकरणामुळे हा मार्ग अधिक मजबूत आणि सुरक्षित होईल. शिरोळ तालुक्यातील ग्रामीण भागातील दळणवळण व्यवस्था मजबूत करण्यासाठी आगामी काळातही रस्ते विकासाला प्राधान्य दिले जाणार असल्याचे सांगितले.
याप्रसंगी जिल्हा परिषद सदस्या प्रचिता कोळी, कुरुंदवाडच्या नगराध्यक्ष मनीषा डांगे, उपनगराध्यक्ष दीपक गायकवाड, संजय बोरगावे,सागर शंभुशेटे, प्रकाश लठ्ठे, बाबासाहेब बागडी, पी.एल.आंबी, इब्राहिम मोमीन, नगरसेवक जय कडाळे, वैभव उगळे, दीपक परिट, तानाजी आलासे, जवाहर पाटील, अक्षय आलासे, दादासो पाटील, रामदास मधाळे, महावीर पाटील, दीपक पोमाजे, बाळासो दिवटे, बाबासो बागडी, सुरेश भोसले, बाबासो सावगावे, रोपन जोंग, शब्बीर बागवान, अल्ली बागवान यांच्यासह पदाधिकारी उपस्थित होते.
आमदार राजेंद्र पाटील यड्रावकर यांच्या माध्यमातून रस्ते विकासासाठी १३ कोटी ३७ लाख ५० हजारांचा निधी
सन २०२२-२३ मध्ये काँक्रीटीकरणासाठी २ कोटी ३७ लाख, सन २०२३-२४ मध्ये काँक्रीट रोडसाठी ३ कोटी ५० लाख, सन २०२५ मध्ये काँक्रीट रोडसाठी १ कोटी ५० लाख, तर आता ६ कोटींचा निधी उपलब्ध झाला असून एकूण १३ कोटी ३७ लाख ५० हजारांचा निधी आमदार राजेंद्र पाटील यड्रावकर यांच्या माध्यमातून मिळाला आहे.